九龍城寨之圍城（有雷慎入）

James

已經好耐無出有關電影既評論文。
睇左「九龍城寨之圍城」原本打算留言「不劇透光影會」，點知越寫越長，所以改為自己出一篇，
以方便大家討論下。
我好欣賞呢部港片，演員有突破不特止，美指既細心用心，武指Kenji san既勁，帶濃濃既香港舊日情懷，
加上我年幼有段時間時常出入城寨，有感情…
要讚既地方多的是，應該下年金像獎會有好多提名。

我無睇過小說或漫畫，單以戲既劇本黎評論，
我睇到一個問題，呢個問題，無聽過有評論講過，
攪到好似係我問題，所以我都想響度講下…

（含雷，含雷，含雷）


龍卷風有情有義，愛護城寨居民，事事關心，
仲聲稱身負乜乜居民乜乜會會長，但唔好唔記得，
佢係犯毒既，一開頭陳洛軍比人打既原因，
就係被誤會係踩場，係黎爭生意。
魚蛋妹媽媽可以話間接係比佢害死（都仲未講間妓寨都應該係佢既生意）
咁多年觀港片既教育就係忠既黑社會就一定唔掂毒，就如古惑仔年代，
都有句「打仔鴻興，四仔東星」，鴻興係比較忠既，
東星就代表奸既一方。
所以呢個劇本上既犯禁，令我睇既時候係會有啲出戲，對龍卷風既死，傷感打左折，
反而最感動既位，反而係魚蛋妹喊住叫[唔想睇勒，走勒，開工呀！]
而最解氣既就係四仔講果句.....「仆街黑社會」。



彈既時候我會諗下應該點樣改會較好.....，

城寨有黃、賭、毒係不爭既事實，改不了，
要改倒不如將狄秋除左係大業主外，改為亦係專責攪毒業務，
龍卷風阻不了，亦管不了好兄弟，而產生暗湧，龍只能控制城寨內既平衡，
照顧仍然可以照顧既寨民，細節位可以再度下，
咁樣至少龍卷風正義形象就更統一，而後來狄秋同龍卷風反面，
會有多一重底層意義。

大家有乜野想讚想彈，都可以提出黎講下。

Login/Register to enlarge

Leah

睇咗～

一直都九龍城寨充滿興趣
這個地方是香港一個奇異又獨特存在哩～
可惜無機會親身去過
但係平時都係一見有關於九龍城寨嘅片或者資料就會睇

不諗我諗我帶咗錯嘅前設去睇套戲
首先完全冇提過任何影評
冇聽過任何呢套戲嘅資料
所以完全唔知佢係改編自其他作品
基本上睇套戲係想知呢個地方如何真實呈現存在過～

Anyways 一開場都已經知係打片同江湖情
Okay 無問題follow 到
林峯的開場、同大老闆的過節設定合理（係俾人喺啲玻璃碎上面拖行之後流晒血之後背脊一啲傷勢都冇～）
古天樂的背景交代都可以
但慢慢去到四仔12少信一出現，先發現原來林峯係要扮20零歲的o靚仔
Oh no 即刻off 咗～
好啦古天樂死嗰場，3子為咗救林峯俾人打到咁竟然一個都無死
仲要黃德斌同林峯講要有心理準備「佢哋同以前唔一樣」
點知佢哋一隻手一隻腳一隻眼都冇少到，四仔除咗面具仲要係靚仔
好啦，打完一晚麻雀，竟然係即日衝返入城寨！
冇傾過策略，你話林峯坐監過三個月有秘密練兵都好丫，
佢哋係直接衝返入去
然後出現TVB謝天華式跳躍，同埋因為一場龍捲風贏咗
我終於知道，原來唔係應該當佢一般江湖片咁睇，
而係應該當科幻片或者武俠片咁睇
咁即係合理晒（係我唔啱hahahaha)

Anyways 整體都係好推介
場景做得好好
我估到片尾出現果啲人應該係真係喺城寨住過嘅人

總睇只是林峯一角我覺得唔應該佢做（雖然佢都做得好好）
只係年齡上真係演唔到～
不過又唔係好諗到有邊個做會好啲～

就這樣～

wave

睇完套戲，改篇自小說、漫畫等可以不理，基本上只係抄左人名。
我視為爽片，我喜歡的KOL形容係香港近5-10年最好的武打電影，
個人不算太喜歡武打片，不過我估佢武術指導同美術指導應該攞金像獎問題不大。

我覺啱睇既原因，因心裡仍有一股童真，想相信「道義」是有價值的。睇到熱血沸騰。
假如不喜歡武打片且對「道義」不感興趣，不妨留意美術指導及CG效果，
有個型格懷舊風的80年代香港（城寨），深刻「熱九」巴士一幕，童年回憶。

James所提既，我理解龍捲風都唔係自覺好人，只係上左位後，進入化境，加上患病時間不多，
想傳承「行事為人」身教俾後輩而作出犧牲，龍捲風之死我覺得佢自己好滿足。
導演作出大刀闊斧的改編我同意，因原著洛軍入城原因似喜劇多啲，照炒應幾出戲。

如果咁都冇興趣套戲，要出絕招，呢套戲係講一個「離不開，留不底」的香港情懷故事，有冇Feel？

最後輕鬆一下，講吓選角方面的趣談。
1. 龍捲風原型就係張國榮，劉俊謙唔做信一做龍捲風都得。
2. 大老板角色口賤抵死，黃秋生啱做，或者周星馳同金手指內的梁潮偉都合適，但呢套成本已三億，加埋巨星應難收得返。
3. 有冇人覺王九好似陳占，搵佢做陳占個仔啱啲。

講講吓有嘢唔明，點解龍捲風知陳洛軍係陳占個仔？純剃鬚啱Feel?

James

Leah replied at 10-5-2024 11
睇咗～

一直都九龍城寨充滿興趣

睇之前我都無睇什麼影評，只知有好多人讚，話演員有突破，
期望係有，都無太多前設。
點解妳會知佢係扮緊個20+青年？
我見佢鬚根多到龍卷風都頂唔順要幫佢剃鬚，以為佢扮緊30+既男人(本身44)，
而張文傑38，劉俊謙係35，最細既胡子彤都32，我又唔覺有違和，
總好過佢扮張無忌既(吳啟華版同樣情況)。


背後磨完玻璃無傷算得乜，無左幾隻手指仲可以揸得穩把刀，
啲拳下下都破板碎石、中左都係叫痛就算，比把刀深插完咁快就無事可以咁大動作，
...無辦法，戲劇效果加上佢係小說漫畫底，就如當年甄子丹、謝霆峰、余文樂套龍虎門一樣，
都係可以去到好誇。
黃德賦果度我覺得係一個gag，只係接番魚排果度無承接「又話你地唔同晒樣既？！」就係有啲怪怪地。
不過有個位唔知妳有無留意，就係城寨果晚同三子打果班，去到盂蘭盛會果場，
王九啲手下係換左(唔肯定有無換晒)，唔見左原先果班(比三子打廢晒？)。


宜家娘炮當道，唔容易搵個夠man、夠說服力去cast呢個角色，仲要後生....
監制莊澄話網民投票首選係另一個影帝峰，但都係細林峰一歲~
陳偉霆38....吳浩康40.....關智斌43......20+既，真係諗唔到。

Marco

Jame 大佬我都睇依部「九龍城寨之圍城」(我在聊天室都提咗一提)。從來冇一部港產片我想睇多一次，我亦都冇睇過小說和漫畫，純粹睇完戲既感受。


依部戲勾起我好多兒時回憶，所以都仲有啲印象。


美指好勁真係九成還原城寨的面貌，部戲描述好多以前既人情世故，劇情雖然簡單，但節奏明快，好能夠表達到當時香港人既生活而且非常寫實，當時真係有人玩標童或神打練刀槍不入。套戲如果可以加長30分鐘交代多啲三個配角(信一，四仔，十二少)身世出處，咁就完美啲。


我同意大佬Jame講，個妹妹仔講個幾句對白係最感人! 妹妹仔演技真係掂! 除咗主角好，其他配角都好好，互相配合好到位。


武指同剪接一流，打鬥動作場面好滑流。整套戲冇冷場，值得一睇再睇!


睇完後，我睇咗以下Youtuber影評，佢自己本身住係城寨十幾年，佢對套戲評論很中肯，睇咗或未睇既朋友可以睇下佢既影評!

Youtuber： Wallace
‘’娛樂咁樣睇‘’

Marco

James replied at 10-5-2024 02:03
[從來無港產片會想睇多一次]？好嚴謹喎，好多港片，我都有睇多過一次，
星爺既戲就唔駛講，文藝既，都有 ...

我意思係從來冇試過港產片想俾多次錢入戲院睇多一次。星爺啲戲就唔使講，買哂VCD, DVD, MP4 loop住睇啦!  

一般港產片都只係睇主角演繹， 好少一套港產片整套戲大部分角色 (所有配角包括個小妹妹) 都有高水準演繹， 而且整套戲導演、監製、美指、武指.、 編劇、剪接.....都咁配合。出年香港金像獎就必定有， 問題只係攞幾多個! 依套戲提升咗三個配角和一個奸角嘅知名度!

有接觸過九龍城寨嘅人，睇呢套戲會特別有感覺， 因為好似回到過去。至於沒有接觸過九龍城寨嘅人， 就可以透過呢部戲了解到當時香港人嗰種掙扎求存同努力拼搏嘅生活。

我都一樣睇咗好多網上影評， 嘗試用不同角度睇部套!同大佬James一樣，上哂腦! 我會再俾錢入場睇多次! 再咀嚼下啲details位!

James

Marco replied at 6-5-2024 17:40
Jame 大佬我都睇依部「九龍城寨之圍城」(我在聊天室都提咗一提)。從來冇一部港產片我想睇多一次，我亦都冇 ...

[從來無港產片會想睇多一次]？好嚴謹喎，好多港片，我都有睇多過一次，
星爺既戲就唔駛講，文藝既，都有唔少會睇多過一次。


唔知仲有無來者，今年如果無更出彩既，美指、武指、特效、剪接、
攝影、編劇、導演....。
都絕對應該拎獎。


我童年都同城寨拉上關係，我都唔覺得佢有幾恐怖，反而真係好有生命力，
剩係睇見啲老人家，幾老都好，無電梯都照樣行七八九十層上下樓梯，
就知道佢地勁。
入面既工場，就真係如片中咁，簡陋而地儘其用。
最難得係片中演員，大部份未上神枱既都神佛升天有提升，有突破。
無人比人彈。
睇完套戲我都睇左不下十幾個講述同影評，入晒腦。

James

wave replied at 8-5-2024 00:17
睇完套戲，改篇自小說、漫畫等可以不理，基本上只係抄左人名。
我視為爽片，我喜歡的KOL形容係香港近5-10年 ...

我有睇[《九龙城寨之围城》删改片段，电影和原著有哪些不同] 呢個，
改左既只係陳洛軍既出身、無左陳占、無左女角們、
王九無殺大老板，都唔算只係借用個名既。


我又唔知龍卷風原型係張國榮喎，咁雖然劉俊謙扮過張國榮(高難度操作)，
但要做龍卷風都幾難有果份壓場感喎。


三巨頭食果餐飯，暗場狄秋就已經交待左陳占個仔，名叫陳洛軍，係偷渡黎的。
虎哥醉住上車都有同十二少講呢單野。


大老板拎比狄秋睇既文件應該全部都係假既，假身份證，
出世紙入境處都未搵到出黎(我印象中，陳洛軍係後來見政府官員先搵到自己身份)，
佢竟然就有，呢度唔知佢點操作。

sandman

一套充滿港產武俠片味道的電影
武打動作充滿力量，技巧和滿滿的惡趣味
最喜歡古天樂喺飛髮舖修理林峰果段
打完接返支煙，直情係關羽溫酒斬華雄嘅現代版

陳洛軍嘅絕招 - 咬耳仔
一招最貼地，最不顧身份，但最實用的技巧
甚有香港人馬死落地行既精神

好欣賞古天樂借套戲傳承香港電影精神
找來一班大卡士帶出新生代演員
(嚟緊就係你哋班後生仔嘅天下)
最深刻係龍捲風拉住信一隻手果幕
(看好劉俊謙~)

諗下諗下九龍城寨都有啲似個會
都係聚集一班不被社會接受既人

(入得嚟，都係一啲麻q煩嘅人)，

個會有自己嘅規矩，
(攪事，命都冇)
亦都有一個好似龍捲風咁嘅大佬
(大佬仲型過古天樂,擦下鞋先~)
我建議城寨四子
可以由solar，隊長，daryl同埋阿jet飾演
大師兄Dino雲師兄可做秋哥虎哥~

Harry

可能近年我睇得太多荷里活商業英雄片，
一開始睇果時用左同一個心態同胃口入場，
但睇睇下，唔對路喎，香港背景黎，廣東話黎，
果欄仲係海邊嫁喎，個心態即時唔同左，
再加上變態級數既佈景，同加埋由頭打到落尾，
美指同武指都系非常用心

不過有幾個畫面有啲奇怪，
成日聽講三不管地帶，但有一幕陳洛軍系寨城入面見到兩個警察，
另外就系四大男角可以無限打不死咁，都比較有漫畫feel,
如果可以多返少少漫畫般既畫面，
可能觀眾心態就唔會係武術科幻漫畫同武打電影之間徘徊
例如多返幾幕龍捲風一招半式就打低陳洛軍之後再接煙頭果種
咁觀眾(只少係我) 心態就唔洗搖擺不定

James

Harry replied at 16-5-2024 18
可能近年我睇得太多荷里活商業英雄片，
一開始睇果時用左同一個心態同胃口入場，
但睇睇下，唔對路喎，香港 ...

我仲以為你想要好似功夫入面既風車腳、琴音剎氣、骷髏兵、接子彈、萬佛朝宗之類既漫畫式情節呢。



始終黎自技擊小說、漫畫，誇張反而合理，
只怪超還原既實景同美術指導既努力，又真係會令人有呢個[圍城]係現實正劇既誤會。


其實除左接煙、穿牆破石外(加埋我上文既疑問)，
咁狹窄既城寨，竟然可以揸架電單車周圍走，
就已經係好難想像啦。

James

sandman replied at 14-5-2024 14:27
我以為古天樂只係代大業主秋哥收租
(片尾仲有幾個細業主)
冇特別插手黃賭毒 (可能之前有)

賣白粉喎，你估賣河粉，無龍捲風同意(或狄秋)，
邊個夠膽響度攪呢啲大生意？
仲要誤會洛軍黎踩場時，都係由頭馬信一去處理，
點可能唔關佢事。
佢同狄秋交數，都只係提[今個月收到既租]，
無講話[收番黎既粉數]。


你講果句，係四仔講的....

Login/Register to enlarge

sandman

Leah replied at 10-5-2024 11
睇咗～

一直都九龍城寨充滿興趣

套戲係誇張咗d既
由一開始巴士窗外跳來跳去
到打到個頭頂穿牆，
再到龍捲風轉身接煙仔，
已經feel到個武指有d動漫feel
所以去到後尾借龍捲風飛返上去已經有曬心理準備

林峰開頭我都覺得可以有更好人選
但係好似大佬話齋
而家啲靚仔都脂粉味太重
好難搵到林峰果種戇戇地嘅感覺
講真呢套戲佢真係超水準，表現令人刮目相看

James

sandman replied at 14-5-2024 14:12
一套充滿港產武俠片味道的電影
武打動作充滿力量，技巧和滿滿的惡趣味
最喜歡古天樂喺飛髮舖修理林峰果段

我原本都唔覺得我似[龍捲風](Louis Koo Tin Lok)，但諗諗下其實係有時間會似....


就係面對你犯埋啲唔應該會犯既錯，闖埋啲估你唔到會闖既禍時.....

Login/Register to enlarge

James

sandman replied at 14-5-2024 14
霆鋒真係唔好啦~

我其實幾鍾意點五步果個男主角

游學修...睇過佢做既同囚(有片)，外歌型都似樣既，身高178cm(林峰180cm)。

Login/Register to enlarge

sandman

我以為古天樂只係代大業主秋哥收租
(片尾仲有幾個細業主)
冇特別插手黃賭毒 (可能之前有)
感覺上佢主要係維持城寨治安，
唔想破壞九龍城寨嘅平衡

果日林峰揸住啲粉嚟賣，即係搶生意
可能會搞出不必要嘅紛爭，
所以佢先阻止

龍捲風都講過：
“喺城寨只要你肯做，一定搵到食”
掂唔掂白粉，係你自己個人決定
有人賣有人買，佢冇義務阻止

James

wave replied at 8-5-2024 00:17
睇完套戲，改篇自小說、漫畫等可以不理，基本上只係抄左人名。
我視為爽片，我喜歡的KOL形容係香港近5-10年 ...

你最後唔明白地方，原來係有原因的，

比我發現左一條片，你睇下就會明。

男團澡堂Ep9 |【九龍城寨之圍城】 被刪剪敏感劇情內容！劇情終於補完了。

sandman

James replied at 11-5-2024 05
睇之前我都無睇什麼影評，只知有好多人讚，話演員有突破，
期望係有，都無太多前設。
點解妳會知佢係扮緊 ...

霆鋒真係唔好啦~

我其實幾鍾意點五步果個男主角
如果佢高d就啱曬

其他”新“演員選擇：
余文樂或者周柏豪都唔錯
游學修(那一天我們會飛)又點睇？

James

wave replied at 6-5-2024 09:20
套戲未睇，但漫畫睇哂，N年前唔係好記得，深刻大老闆似足丁蟹，奸奸吓太受歡迎洗白左。
睇完再留言，呢套口 ...

可能因為名有「圍城」兩字，加埋佢有搭實景出黎拍，所以我都有呢個聯想呀。唔急，睇完先黎講。

James

Marco replied at 6-5-2024 17:40
Jame 大佬我都睇依部「九龍城寨之圍城」(我在聊天室都提咗一提)。重來冇一部港產片我想睇多一次，我亦都冇 ...

幫你刪左一啲會易暴露身份既資訊，同埋改正左啲錯字，稍後再回覆你。

Marco

James replied at 18-5-2024 07:05
希望唔好跌入續集爛尾既魔咒。
好有興趣邊個做年青既大老板。

我唔期待續集好過第1集， 只希望唔好差得太多!


續集唔希望擺鄭伊健落去， 因為佢做戲真係一般。

James

Marco replied at 17-5-2024 17:11
九龍城寨三部曲確定開拍：
由《九龍城寨之龍頭》及《九龍城寨之終章》成三部曲續作！

希望唔好跌入續集爛尾既魔咒。
好有興趣邊個做年青既大老板。

wave

套戲未睇，但漫畫睇哂，N年前唔係好記得，深刻大老闆似足丁蟹，奸奸吓太受歡迎洗白左。
睇完再留言，呢套口碑好好，撐香港電影
我睇預告時，唔知點解聯想到「十月圍城」

Marco

James replied at 6-5-2024 18:34
幫你刪左一啲會易暴露身份既資訊，同埋改正左啲錯字，稍後再回覆。

明白

有勞大佬!

Marco

九龍城寨三部曲確定開拍：
由《九龍城寨之龍頭》及《九龍城寨之終章》成三部曲續作！

Simpson

「九龍城寨之圍城」好有港產片既黑社會打鬥氛圍，正﹗